27. november 2017

Ph.d-nngorniatut ilinniarnini aallartippaa

Oktobarip ulluisa aallaqqaataanni Mette Mørup Schlütter-ip Issittumi Utoqqalineq qulequtsiullugu suliniummi ph.d-nngorniatut ilinniarnini aallartippaa. Mette Ilisimatusarfimmi Peqqissaasutut Ilinniartitaanermi Peqqissutsimullu Ilisimatusarnermi Instituttimi Aarhus-illu Universitetiani Kulturimut Inuiaqatigiinnullu Instituttimi ilinniartutut nalunaarsimavoq. Atorfia Aarhus-ip Universitetiata, Issittumilu Utoqqalineq qulequtsiullugu suliniutip Ilisimatusarfiullu suleqatigiinnerisigut aningaasaliiffigineqarpoq.
Katillugit qaammatini aqqaneq marlunni- ilaatigut Uummannami Nuummilu najuulluni sulineq tunngavigalugu Kalaallit Nunaanni utoqqat akornanni- ulluinnaat immikkut qitiutillugit- utoqqalinerup qanoq misigineqarnera Mette-p misissuivigaa. Inuunerup oqaluttuassartaanik katersineq aqqutigalugu utoqqaat inuuneranni allarluinnarmut killinneq inuunerullu oqaluttuassartaasa utoqqaat utoqqalinerminni nalorninartorsiorlutik unammilligassaqarlutillu, utoqqalinerulli nassatarisaanittaaq nukittoqutit, ilisimasaqassutsip iluaqutitaasullu inuunermut sunniutaat ilisimatusarfigai. Mette-p Kalaallit Nunaanni najuulluni sulinissaanut allattariarsukkatigullu suleqatigiissuteqarnernut atatillugu aningaasartuutissaanut matussutissanik aningaasaateqarfik Ensomme Gamles Værn 235.090 koruuninik tapiissuteqarpoq.
Mette februaarimi Uummannamut nuunnissami tungaanut Aarhus-ip Universitetiani inuup inuiaqatigiillu pissusaannik ilisimatusarfimiittussaq una aqqutigalugu attavigineqarsinnaavoq: memosc@cas.au.dk . 2018-imi septembarimiit Mette Ilisimatusarfimmiilissaaq.