17. december 2018

Sisimiuni ataatsimoorluni suliniuteqarnikkut aneersuarfissatut pilersitaq nutaaq inunnut angalalluarsinnaajunnaarsimasunut periarfissiissaaq

Pinngortitamiissinnaanerup inuunerup naleqassusaanik misiginermut aalajangiisuulluinnarnera, nunatsinni utoqqaat amerlanersaasa oqaatigaat. Kikkulli tamarmik pinngortitaq silatinnguaminiikkaluaq ornissinnaasanngilaat. Periarfissiissutit ilaatigut ajornartorsiummut tamatumunnga aaqqiissutaasinnaapput.

Issittumi Utoqqalineq qulequtsiullugu suliniutip Qeqqata Kommunia, APEN (KADK, illussanik titartaasunngorniat ilinniarfiat) suleqatigalugit, Sisimiuni utoqqarnut inissiat eqqaanni ajornanngitsumik orninneqarsinnasumik aneerasaarfissamik inerisaaqataavoq. Suliniut angerlarsimaffinni ikiortit aqutsisuannit isumassarsiamik Issittumilu Utoqqalineq qulequtsiullugu suliniummi ilisimatusarnermi misilittakkanit isumassarsiamik tunngaveqartoq, ataatsimoorluni suliniuteqarnikkut pilersitaasoq. Kommunip atuilluartuunissaq pillugu siunnersortaa suliniummik inerisaanermut aamma ilannguppoq.
Juuni qaammat 2018 najugaqartut peqatigalugit,
peqatigiilluni ilusiliinissaq pillugu arlalinnik suleqatigiissuteqartoqarpoq, ukiaq mannalu aneerasaarfissaq sananeqarluni. Taanna atserneqartoq Asiarfik decembarip ulluisa tallimaanni atoqqaartinneqarpoq.

Qeqqata Kommuniata atuilluartuunissamut aningaasaateqarfia suleqatigiissuteqarnernut sanaartornermullu 400.000 koruuninik aningasaliisuuvoq. Issittumi Utoqqalineq qulequtsiullugu suliniut Asiarfiup atorneqarneranut atuisunillu akuutitsinerup qanoq ingerlasimaneranut tunngatillugu misissuinermik malitseqartitsissaaq.

Suliniut annertunerusumik paasisaqarfigerusukkukku, Kamilla Nørtoft attavigisinnaavat: kamilla.nortoft@hum.ku.dk


Asiarfiup atoqqaartinneqarneraniit asseq. Assiliisoq: Marianne Olsen