Ilisimatusarneq – Københavns Universitet

Ilisimatusarneq

Isittumik utoqqalinermut atatillugu ilisimatusarneq apeqqutinik ilisimatusariaatsinillu assigiinngitsunik tunngaveqarpoq. Ataatsimut isigalugu annertussusiliilluni innuttaasunik misissuisitsinernik tunngaveqartumik imarisaalu tunngavigalugit- inuup inuiaqatigiillu pissusaannik oqaluttuarisaanermullu tunngasunik misissusinernik- immikkoortortaqarpoq.

Annertussusiliilluni misissuinerit
Ilisimatusarnerup immikkoortua annertussusiliilluni misissuineq, Statens Institut for Folkesundhedsvidenskab-imit (SIF) Kalaallit Nunaanni innutaasut peqqissusaannik misissuisitsinernik ingerlatsisumit SFI-imillu Danmarkimi utoqqaat pillugit paasissutissanik katersivimmut akisussaasuusumit, suliarineqassaaq.

Taakku marluk apeqqutinik akiuilluni skemanik immersuisitsinikkut ingerlanneqassapput. Kalaallit Nunaanni Danmarkimilu utoqqaat akissutaat assersuunneqarsinnaanngorlugit paasissutissanik katersivinni taakkunani marlunni apeqqutit ataqatigiissaarneqassapput. Ilisimatusarnerup immikkoortua taanna, utoqqaat peqqissusaat inuunerminnilu atugaat innutaasunillu misissuisitsinerit taamaattut nunap immikkoortuini immikkoorutinik takutitsisinnaanerulersillugit, qanoq iliornikkut pitsaanerulersinnissaannut ilisimasaqalersitsissaaq.

Imarisat tunngavigalugit misissuinerit
Ilisimatusarnerup immikkoortua imarisaanik tunngavilik inuit ataasiakkaat ulluinnarni inuunerannut, utoqqarnik paaqqutarinninnermi poltikikkinut periutsinullu Kalaallit Nunaannilu kommunit utoqqarnut neqeroorutaannut allanut qanillattorneruvoq.

Taanna København-ip Universitetianit Ilisimatusarfimmiillu isumagineqartoq, utoqqaat ilinniakkallu tunngavigalugit peqqinnissakkut sullissisut akornanni, inuup inuiaqatigiillu pissusaannik tikillugit misissuinermik kiisalu utoqqannik sullissinermi peqqinnissaqarfimmilu ilaatigut politikkinik, iliuusissatut siunniussanik, innuttaasunik paasissutissiinernik assigissaannillu allattugaatinik misissuinermik immikkoortortaqarpoq.

Tamatuma saniatigut oqaluttuarisaanermut tunngatillugu utoqqaat inissisimanerannut atugaannullu tunngasunik misissuisoqassaaq. Utoqqaat siornatigut maannalu inuiaqatigiinni inissisimanerisa periarfissaasalu ilisimalernissaat kiisalu utoqqaat naalagaaffiup atugarissaarnissamik isumaginnittup taassumalu sinniisaanut attuumassuteqarnerisa paasinissaat siunertaavoq.